Hringtu Nu le Ni hi miphun dangdang le ram dangdang um kan sining bantukin caan khatte ah tuah loin ai dangdang ah tuah a si. US, Australia, Canada le India nih cun May zarhhnihnak ah an tuah. Cucu kannih Laimi zong nih kan zulh vemi hi a si.
Hringtu Nu le Ni kong he pehtlai in Izip mi sin in tuanbia ahmasa bik hmuh a si i an biakmi Nu Pathian Isis timi in ai thok. Amah hi Pharaoh hringtu nu a si tiah an timi le an cohlan mi a ti. Cu hnu ah Mother's day cu Karik miphun nih an rak tuah ve. Cybele siloah Rhea min in an rak tuah. Amah cu pathian hna i an nu asi tiah zumhnak an ngei i a caah Ni sunglawi an rak serpiak. Mah hnu ah Rom cozah nih vawleicung hmun tampi a uk hna i Rome mi nih biatak tein Hirngtu Nu le Ni cu an sunsak i Nithum chung March thla 15-18 ah an rak tuah. Jesuh Khrih chuahhlan kum 250 ah rak tuahmi a si cang.
UK ( England ) ram ah Jesuh Nu Mary upatpeknak tiin aluan ciami 1600 ah an rak tuah ve. An tuah ning belte cu caan tlawmpal hnu ah ai dang ve than i Mothering Sunday tiah auh len a si. Misifak fa le kha mirum hna sin um le riantuantu an si I, cu tikah an i manh caan te ah inn an lawi I, Biakinn ah an kal i cu caan te ah cun an nu le upatnak an pek hna. Laksawng le pangpar an pek tawn hna.
US ram in biazai phan minthang a simi Julia Hard Howe nih Hringtu Nu le Ni cu US ram ah tuah kho dingin 1870 in a rak i zuam nain cozah pawmpi tiang dingin a rak chuah luh kho lo. Sihmanhsehlaw 1914 ah US ram ah hringtu Nu le Ni cu Anna Jarvis nih cozah hngalhpinak in a rak tuah khawh i a mah hi US ram ah Mother's day thoktu (Founder of Mother's Day tiah an auh). Anna Jarvis nih Hringtu Nu le Ni tuah dingin a rak izuamnak le a rak thoknak a ruang cu a nu Ann Maria Reeves Jarvis nih thla a rak camnak in a si. Cu a thlacamnak cu nikhat khat, caan khatkhat ah Nu hna hi upatpeknak ngeih si te sehlaw tihi a si.
Cu a thlacamnak cu a fanu nih a philh lo. Anna a nu thih hnu ah a nu cu zeitindah upatnak ka pek lai tiah ai zaum. 1905 kum, Anna a nu thih hnu kumhnih ah a nu cu upatpeknak caah mother day tuah kho dingin US ram ah ai zuam. Anna ruahnak le zuamnak cu mitam pi nih tha an pek i mother's day tuah kho dingin cozah sinah ca in siseh, hmur le ka in an chim.
American President Woodrow nih May 8, 1914 ah Hringtu Nu le Ni cu May zarhhnihnak ah siseh tiah zunglei hnatlaknak pinak he bia a chah.
Nihin chun caan ah cun Hringtu Nu le Ni cu vawleicung ram 46 nak tam nih hman a si cang.
Kannih Laimi nih cun Hringtu Nu le Ni sunglawi kan hmannak hi a sau rih lo. Kum 10 nak tam hrawng te lawng a si rih. Hringtu Nu le Ni asullam tak cu Nu le upatpeknak le zeitluk in fale caah an sunglawi ti kha a thar in hngalh thannak kha a si.
Tu chun ah Hringtu Nu le Ni a hmang khomi kan zate nih zeitindah hi ni hi kan hman? A luan cia caan ahteh zeitindah kan hman. Kan nu le hi kan sunglawih kho taktak hna maw? Fa le an kan dawtnak ruangah kan caah harnak phun zakip an tuarnak hi kan i fiang taktak maw?
Kan nu le a kan dawtnak cu hmur le kaa in chim cawk a si lo. An pawchung kan um liote ah ka fa caah tiin ngeihlo chun te eithaw le dinthaw kanmah caah ruat in an kan eipiak. Kan chuahka in a kih caan ah an tanglum cungte ah an kan zual. Nilin caan ah anmah nilin tuar in an thladem an kan pek. Hawi fa an tluk sual lai lo tiah an thazang dihlak chuah in an thlanhripi pawtin rianhrang tuan i fimnak a kan cawnter. Fa le hniphuan caah tiin an mah cu thilthuam tha hmanh an izalh duh lo. Nunnak thap in fa le a kan cawmtu a kan zohkhenhtu cu kannu le hi an si. An va sunglawi hringhran dah. Hi vawlei cungah miroling nanmah leng in fale nih homanh kan in ngei hna lo. Ngeihmi zong an um lo.
Kan zawt caan ah siiinn kan um tikah Nurse Saymah tenih cun phaisa pek in an Duty caan chungte cu biathlumthlum in an kan zohkhenh, an kan thlawpbul. Sihmanhsehlaw an Duty caan a dih cun an rian ailaklawh hmanh ah an kan lawi tak diam ko. Sihmanhsehlaw Sungno hringtu kan nu le cu, ni le caan rel lo in fa le caah tiin chun dang lo, zan dang lo in kan pawng te ah an kan um pi i an kan thawpbul. Phaisa fangkhat hmanh an hmu in kan pe hna lo. Cu hmanh ah an ngeih chunte an khawnmi phaisa kafa damnak ah tiin siang tein kan caah an hman.
Nihin chun ah Hringtu Nu le Ni a hmang khomi kan za tenih Nu le upat thiam hna sih. Sungloih le conglawmh zong thiam hna sih, cucu Hringtu Nu le Ni (Mother's Day) nih ai tinh mi le a kan duhsakpiak mi cu a si.
Marin C. Garretty nih "Nu le dawtnak cu thil kan tuah khawh lomi tuah khawh nak ding (Datsi) fuel bantuk thazaang a kan petu a si".
Jewish Phungtluk ah, "Pathian hi hmun kipah a um khawh lo caah hringtu Nu le hna hi a ser hna".
Henry Beecher, "Nu le thinlung cu fale fimcawnnak sianginn khan a si"
No comments:
Post a Comment