Farasi Konglam Tawi Le An Zumhnak Tlaihtleng:

Farasi cu midang he then in nunthiang in kan nung ai timi an si hna. Farasi ti sullam cu ai then mi tinak a si.


Farasi ti tik ahhin phungki pawl nun bantukin a nungmi hna ti khawh zong an si fawn. Anmah cu nawlbia ningin Pathian rian felfai taktak in riantuantu kan si an ti. Rawl ulh a thawng ngaimi le thlacam saupi in a cam thiammi an si.

Farasi cu tlangbawi phun an si lo. Mizei phun paoh Farasi ah luh khawh a si. Cu phun theng nih Farasi si awk a si timi a um lo.

Farasi tampi cu phungbia cawnpiaktu le cawnnak sang pipi a ngeimi an si hna. Mizapi nih an duh ngaimi hna le mi thianghlim timi an si I, an cawnpiaknak hi mi tampi nih an cohlan. Cucaah Farasi cu mizapi nih dirpi mi le cohlanmi an si.

Farasi nih phungbia cawnpiaknak pawl hi an cohlan hna i biapi taktak in an i nun pi fawn. Minung thawhthannak, nehhnu biaceihnak, vancung mi le khuachia le Pathian nih direct in minung sinah zohkhenhnak a ngei tiah an zumh. Anmah chan Pathian bia rak timi Biakam hlun hi Pathian nih thaw a chuahhnawhmi a si tiah an zumh. Khatlei in tih an nunnak pakhat cu phunglam hna hi an i hrut pi i Pathian bia he ai ruang in an chiah. An duhmi tlinhnak ahcun caan saupi lakin thil an tuah tawn.

Mithiang Paul zong hi cawnnak lei ah thiamsang a si bantukin Farasi pakhat a si ve.

Kan bawipa Jesuh nih Farasi pawl cu hi vawleicung a rak um lio ah a doh ngaingai mi hna an si. Farasi bantukin si hlah u tiah voi tampi bianabia zong a chim. Farasi pawl cu mi hmuhnak ah thiamco hi an duh. Cucu biapi taktak ah an ruah i, a zuam zong an i-zuam fawn.

Farasi pawl cu tlangbawi phun le mi tampi an si lonain mizapi nih thazang pekmi le dirpi mi an si caah Sanhedrin biachahnak ah nawlngei ngai mi an si.

Farasi le Sadusi hi zumhnak le tuahsernak ah an i-dang ngaingai nain Jesuh Khrih hremnak le thahnak ahcun an lung ai ruang (Mark 14:53; 15:1; John 11:48-50).

Farasi pawl cu ramkhel nakin biaknak lei biapi ah a chia deuhmi an si. AD 70 hnu Sadusi pawl an tlau dih hnu zongah Farasi pawl cu an fek rih. Cu hnu ah duhsahte in an tlau ziahmah ve.

Farasi pawl nih an tuanbia lakah a fakbik an timi le a celh in an celh lomi thil pakhat a cangmi cu Alexander Jannaeus (103-76 BCE) pen lio, a nupi chun lawmhnak ah Jew miphun thongtla pawl minung 800 cu Jerusalem ah vailamtah awk le an nupi le an fale pawl cu an pasal hmuhhmai ah an hngawngtan dih ding nawl a rak chuah kha a si. Mah hi minung 800 vailamtahmi an dihlak cu Farasi chungtel an si hna. Alexander Jannaeus cu John Hyrcanus fapa a si. (Cc:Background to the Gospels)