Kawlram Le Russia Nuclear Thazang Caah Hma An La Ti Than:

Kawlram le Russia cu Nuclear thazang sernak caah thazang lak awkah hnatlaknak an ngei tiah Worl Nuclear News vawleicung Nuclear thawngthanhnak nih a tialmi RFA nih a langhter.


Russia ram Rosatom tiah min pekmi Nuclear sernak lei ah hmalatu Nikolay Spassky,  Kawlram a tlawnnak ah ram hnih in nuclear thazang sernak lei he pehtlai in March 26 ni ah hnatlaknak an ngeih chap hi a si.

Nikolay nih Kawlram Vice president U Nyan Tun, ralkap bawizik Min Aung Hlaing le minister of science and technology Ko Ko Oo and electric energy minister U Khin Maung Soe hna he tonnak le ceihhmainak an ngeih pi hna.

Ceihhmainak ah zeitindah nuclear thazang sernak ah phung ningin kan tawlrel lai timi, phung ning tangah hmalak awk le cawnpiaknak ngeih ding telin chathar sining in nuclear thazang hman khawhnak caah tiin hnatlaknak tuah a si tiah Nikolay nih a ti.

Kawlram cu 1957 kum ah International Atomic Energy Agency member a rak si i 1992 kum ah Nuclear karhcho lo awkah hnatlaknak a tuahtu a si fawn.