A voi 4nak Hero Cup Quarter Final an phan, Team pariat lawng an tang cang:

Miharsa bawmhnak pek ding hmuitimh in rak dirhmi Hero Clup (Harsa Bawmhnak Phu) hruainak in Hakha tuah cuamahmi Hero Cup pumpalulh puai cu quarter final tiang an phan i team riat lawng an tang cang.


Hero Club hotu Salai Siang Biak Lian nih “Nihin April 20 hi Quarter final puai 4 kan lim lai.

Thaizing hi Semi-final puai 2 lim ding a si. April 22 khi final a si lai i pakhatnak le pathumnak an chuih lai,” tiah Hakha Post ah a chim. Quarter Final chuih ding puai li hna cu Unity Vs Olympian,

Cedar Vs Brother, Pioneer Vs Vazuun le Chindwin Stars Vs Zilthli hna an si.

Tutan Hero Cup laksawng cu December 2014 ah motor vanchiatnak in nunnak a liammi Engineer Lambawi Salai Roger philhlonak ah Chin Hood Company nih laksawng an pekpiak hna lai i pakhatnak Ks.220,000, pahnihnak Ks.120,000, pathumnak Ks.60,000 le a dangdang pumpalulh puai i tuahmi laksawng vialte pek ding a si.

Tutan a voi 4nak Hero Cup ah team 25 an nih tel i a thiammi lawngte a si caah puai kip i zuamnak a faak ngai cang i, zoh a nuam ngaingai cang. Final cu April 22 chun suimilaam 1:00 in thawk a si lai. (Cc:Hakha Post)