CBC (Falam) zung motor Zawngkong khua pawng ah aa let, minung pahnih an thi:

Falam le Kalaymyo lam Zawngkong khua pawng ah April 20 chun 11:30 ah aa let i CBC Youth Secretary Pastor James Khai Tual le Taingen khua pastor Cin Thian Nang a hmun ah an thi.


"A hmun ah cun thi colh hna kaw, an i leh ning hi aho nih fiang in theih a si rih lo. Sy James hi a fapale pahnih an i tel i annih tu cu an i khawng ve nain thinphang tuk cu an si lo. An ruak hi palek nih Kalay ah an kirpi hna i Kalaymyo ah siibawite nih zoh hnu ah an khua cio ah kalpi ding a sih. Sy James Khai Tual hi SRBA (Sizin Region Baptist Association) i Khuasak khuami a si. Kanmah kan duh ning ahcun an ruak hi CBC ah phanhpi i program ngeih hnu ah an khua ah kalpi kan duh nain Kalay lei an phanh cang caah an fale tu hi siibawite nih an zoh lai i kal pi awk an that ahcun kalpi ding an si. Cucu caah thawng a theimi vialte nih chungkhar le zung riantuantu hna caah thlacamnak in rak kan bawm cio u," tiah CBC Vice Chairman Rev. D. Vai Lian Zul (FBC) nih Hakha Post ah a chim.

Saya James le Saya Cin Thian Nang hi CBC Youth Department program in Limkhai ah Conference an kal i an kir lei a si. An motor hi Pajero a si. Saya James hi fa paruk a ngeimi a si i, Saya Cin Thian Nang hi Chin Christian Institute of Theology ah M.Div a kai pah in an khua ah pastor a tuanmi a si. Sy James a fapale pahnih hi Falam sii-inn ah an phanhpi hna. (Cc:Hakha Post)