Australia Pumpak I-laknak (CPP) Kong Tawi:

Australia ram pumpak sponsor in kan kalnak he pehtlai in biahal mi tete an um pah lengmang caah a tawinakte in a tanglei ah ka van tial. CPP timi cu Community Pilot Proposal ti a si. Hi lak dingmi cu UN Card a ngeimi, ramhnih nak ah a ummi si a herh.


June thla ahhin mithar an lak le lak lo ai thei lai. Voi khat lak ah minung 500 a si. Vawleicung ralzam paoh nih sok khawh cio a si. A voi thumnak hi a ralaimi June 2015 ah an on lai tiah zumh a si. Nain a fiang rih lo.

Australia ah a ummi pakhat khat nih sponsor tuah ka duh hna tiah MRC Migrant Resource Center office ah va kal in hi laknak hi va hlat a hau.

MRC zung nih hi bantuk laknak lei ah tavuan a pekmi hna an um. Cu ka ahcun min pek a si. Booking tuahnak ah Stage A $ 660 hrawng pek a hau. Cu hnu ah minung 500 an full rih lo ahcun Form rak ap ti a si le Stage B $ 6000 tluk pek a hau. (Mah hi phaisa pekmi hi Stage A le B ti a si le interview tuahnak maw siloah medical sungh sual i cohlan si lo sual ahcun sungh dingmi a si.)

Cu hnu ah Stage C timi Visa man le MRC man pek a si le. Main applicant caah $ 16444 midang fale le nupi le minung pakhat ca cio ah $2680 le $ 2750 pek than a si. Cun Bond caah $5000 chiah a si i phak hnu kum khat hnu ah Bond chiahmi $5000 cu a kir than.

Stage C phaisa pek hi cu Embassy ah interview tuah hnu Visa ngah a fian hnu ah pekmi a si.

Medical check nak ah a dihmi zong mah tein liam a herh fawn. Visa hngah hnu ah mahte in Air Ticket i cawk a si rih. Air Ticket man hi cu duh le IOM ah phaisa cawi khawh a si.