Ralzam Malaysia Ah Cohlan An Si Lo: Shahidan

Malaysia nih ralzam le dornak haltu hna, ahleiin Myanmar in Rohingya pawl caah innka onpiak a si lo, humhimnak caah tihnung an si tiah theSundaily nih a thanh.


Malaysia cozah sining cu ralzam le dornak haltu cohlan lo le theih pi lo timi ka nawl than tiah Prime Minister Department in Datuk Seri Shahidan Kassim nih a ti i, cun mah ram ah kirter awk timhtuah zokzok dingin UNHCR a chimh rih hna.

“Luhnak kan on ahcun ramchung ah ti bantukin an khat dih lai. A poimi cu kan ram an umnak nih kan humhimnak a buaiter. Buaibainak tamtuk an chuahter,” tiah Shahidan nih 16 April ni ah Dewan Negara ah a chim.

Ralzam hna cu cozah sianginn ah fimcawnnak onh an si lo i cozah nih a theih pi lomi sianginn lawngah fimnak an cawng kho tiah thawng theih a si.

A cozah nih UNHCR cu an ram kirter awk le ram thumnak ah kalter hi biatak tein a fial. Kannih cu 1951 kum Refugee Convention le 1967 kum Refugee Status Protocol hna ah hnatlaknak tuah lomi kan si, hi hnatlaknak a tuahtu ram Cambodia siloah Phillippines ram hna ah Rohingya miphun hi an kal awk a si tiah Shahidan nih a chimchap.